講到蕭芳芳演過嘅經典人物,不得不提林亞珍。講座上,芳芳姐都有提起佢,又自嘲已經係「林老珍」,仲即時攞咗支handcream搽手笑:「木乃伊都要潤一潤。」

講到當年如何塑造「林亞珍」此角?芳芳姐稱冇刻意去諗,只係買了個冬菰頭假髮,黑框眼鏡,家中求其搵條牛仔褲,又問電視台服裝間搵咗件大碼恤衫,結果俾咗件梁醒波嘅衫俾佢。芳芳姐感謂:「梁醒波在天之靈都保祐我做喜劇。」

芳芳姐又稱,年輕時拍咗太多喊戲,所以先發現自己係好鍾意演喜劇。90年代同周星馳拍過《新精武門》,有一幕講佢同星爺講講下,芳芳姐爆咗句「仆你個街」就將星爺推落河。芳芳姐以為自己爆粗嗰下係笑點啦,點知入戲院一睇,觀眾都冇笑,反而係笑星爺跌落水嗰下。

芳芳姐謂,星爺係佢遇過最用心做戲嘅人,喺片場係完全唔會同人傾偈,而係不斷咁提升自己:「呢個人真係好犀利,我都服咗佢。」又憶述有時crew要接星爺嚟開工,芳芳姐都試過等成個鐘。「但係我都覺得好抵嘅,佢上到車我仲對佢好好。」

一直受耳患困擾嘅芳芳姐,自言依家每日都聽到三種聲音,分別是瀑布聲、打樁機聲,同埋100隻蟬齊鳴。問她何以在如此惡劣情況下仍能保持幽默感?芳芳姐就話:「因為有高人指點,山後練劍。」

談到護苗基金成立二十周年,芳芳姐感受良多,佢話最重要係學到是謙卑,試過約大夥兒出來食飯勸捐,但無人肯捐,芳芳姐返家痛哭流淚。「後來有人同我講,你唔係叫人俾錢你,只係你勸人募捐。」當下釋然。

芳芳姐稱,覺得香港保護兒童之法例太落後,應該修改。司儀此時再問她,如此頑強生命力,可否分享大家借鏡學習之處?此時芳芳姐就話喇:「頭可斷,血可流,腰間不可積肥油。」

(資料來源:網上截圖/連結)